Nas terras baixas da parroquia, preto do río Santa Lucía, localízase a igrexa. Nela destaca un retábulo de 1641, realizado por Domingos Vaamonde, tallista compostelán. A nave central e a torre datan do S.XVIII, sendo a capela maior algo máis antiga. Detrás do adro, tras pasar as edificacións da rectoral, acharemos o cruceiro co altarciño, a onde se dirixe a procesión do Corpus. Ás costas do cruceiro, álzase a parede natural do Castro, como a muralla dun poboado mítico celoso dos tesouros que garda. Aí emprazábase antano a ermida de San Toribio, figura que, coa Virxe do Rosario, se pode ver hoxe na igrexa, ámbalas dúas imaxes pertencentes á capela desaparecida.
Outros puntos de interese da freguesía son o cruceiro do lugar de Piñeiro (S.XVIII), os muíños da ribeira do río Santa Lucía (á beira da ponte que comunica Illobre co Eido dos Ferreiros, Teo), e o entorno da ponte de Carreira coa súa Burga (manancial de augas mediciñais).
O festexo máis notable é o da virxe das Angustias, que se celebra o domingo de Pascua, e o Sto. André o 30 de novembro.